Gaga

Jón Ómar er enn með smá hita, rokkar á milli 37,2 og 37,6 og ég vil bara að þessar kommur fari alveg áður en við förum út aftur. Ég er að verða nokkuð geðveik á þessari inniveru. Þetta veður hjálpar nú ekki mikið heldur, það væri nú munur að geta sest út á svalir á meðan Jón Ómar leggur sig en það er ekki inni í myndinni - blómin mín berjast fyrir lífi sínu þarna úti. 

Ég ætla að þjóta út um leið og Svenni kemur heim og hlaupa smá hring um hverfið, svo ég verði nú ekki óþolandi leiðinleg í kvöld. Á næstu jólum verðum við í sólinni og ég ætla að vera í mínu draumaformi þá. En nota bene, draumaformið mitt er kannski ekkert draumaform einhvers annars og sama í hvaða formi við erum þá getum við auðvitað notið þess að vera í sólinni. En þetta er mitt markmið og það er alltaf gott að vinna að einhverjum markmiðum.

Í kvöld ætla ég svo að hafa eitthvað létt og gott í matinn, tómatsúpu og eggjamöffins - máltíð er ekki máltíð án próteins hjá manninum mínum. Ég fann svo skemmtilega uppskrift að eggjamöffins, sniðugt að hafa svoleiðis með súpum eða salati, get látið ykkur hafa uppskriftina ef þið hafið áhuga.

Heyrumst seinna.

8. júní

Þann 8. júní er brúðkaup Madeleine prinsessu og unnusta hennar, bandaríska fjárfestisins Chris á dagskrá. Hún var áður trúlofuð öðrum manni en sá skítablesi hélt framhjá henni með norskri píu, hans missir. Madeleine er uppáhalds prinsessan mín, má maður eiga uppáhalds prinsessu orðinn 27 ára gamall? Hún er svo falleg og alltaf svo fallega klædd, fyrir utan reyndar á þessum myndum, alveg hræðilega óklæðilegur kjóll. Jæja allavega, ég ætla að vera límd fyrir framan sjónvarpið og ég ætla ekki að missa af einni sekúndu, ohh hvað ég hlakka til.

Helgardagbók

Ég fékk að sofa út á laugardeginum og svo þegar ég vaknaði þá fífluðumst ég og Jón Ómar aðeins saman, ég ýtti honum út um allt í þessari körfu og honum fannst það hrikalega skemmtilegt. Bakið á mér var ekki alveg sammála. Ég verð að fara að hreyfa mig meira, líkamninn á mér er alls ekki ánægður með þetta hreyfingarleysi.

Svo var kominn tími til að hringja í Unni okkar sem átti afmæli á laugardaginn. Jóni Ómari fannst þetta mjög spennandi og við fylgdumst með henni borða humar og annað gúrmet meðlæti í hádegismat. 

Klukkan 14 var kominn tími til að gleðjast með elsku vinkonu minni henni Viktoríu sem á von á sér bráðum, við náðum að koma henni alveg í opna skjöldu og þetta var rosalega gaman. 

Um kvöldið var okkur boðið í Eurovisionpartý hjá tengdó og Jón Ómar lét ekki lætin stöðva sig í því að fá sér smá kríu. Ég má ekki pikka of fast á lyklaborðið hér heima þegar hann leggur sig því þá vaknar hann en þarna gat hann sofið vært í Eurovisionhávaðanum, sanngjarnt. 

Við foreldrarnir höfum ekki sofið mikið undanfarið vegna veikinda og ætli tengdaforeldrarnir hafi ekki séð aumur á okkur á laugardagskvöldinu þar sem baugarnir á mér voru ógnvænlegir. Á sunnudeginum tóku þau Jón Ómar í nokkra klukkutíma og ég gerðist svo villt að henda mér upp í rúm með te og bók og steinrotaðist svo. Reyndar fórum við í lax til mömmu minnar í hádeginu en ég náði því miður ekki mynd af því. 

Þegar ég vaknaði úr rotinu bauð maðurinn minn mér út að borða og fórum við á Uno. 

Ég fékk mér hamborgara og salat í staðinn fyrir franskar, salatið var geggjað! Reyndar var hamborgarinn góður líka en salatið betra, hefði viljað stóra skál af því. 

Eftir matinn löbbuðum við með Dimmu um miðbæinn. Hér er ég í Grjótaþorpinu, svo kósý! 

Væri sko alveg til í að búa hér, ekki Svenni. 

Í dag fór ég svo út að hlaupa og ákvað að reyna þennan stiga. Á miðri leið langaði mig að skilja lungun eftir í einni tröppunni. Næst skal ég hlaupa alla leið án þess að stoppa. 

Svo enduðum við þennan annan í Hvítasunnu á ítölskum parmaskinku-kjötbollum. 

That's all folks!

Flos by Gino Sarfatti

Á þessum meterslanga óskalista sem ég var að tala um er m.a. þetta fallega loftljós frá Flos. Dísús þvílík fegurð! 

Eames

Elska þessa svörtu möttu elskur frá Eames! 

***

Það má eiginlega segja að þegar ég hætti að baka svona mikið að þá hafi áhuginn færst yfir í innanhúshönnun. Ég hef alveg verið gróflega með á nótunum  hvað varðar hönnun en nú er ég komin mun meira inn í þetta allt saman. En það hentar einmitt mjög vel fjárhagslega séð að vera með meters langan óskalista og í fæðingarorlofi. Ég hef verið mjög hrifin af klassískri innanhúshönnun, svona svolítið franskt glamúrdæmi en ég er eiginlega alveg búin að fá nóg af því. Ég les mikið af sænskum innanhúsbloggum og þar fær maður stundum illt í augun af öllu hvítu, hvítt er fallegt en fyrir minn smekk þá þarf það að vera í hófi. Drauma heimilið mitt er fallegt steinhús frá ca. 1920-50, hvíttuð eik á gólfum, hvítir gólf -og loftlistar, hvítir veggir og innréttingar. Húsgögnin á hinn bóginn eru svört (eins og stólarnir hér að ofan) massíft eldhúsborð úr eik, skandinavísk hönnun og falleg myndlist. Ég vil að heimilið sé hlýlegt en samt töff, ekki hvítt og rómantískt. 

Ef þið sjáið fallega jarðhæð í Hafnarfirði í þessu steinhúsi sem ég var að tala um hér að ofan þá megið þið endilega láta mig vita ;-) 

Einfalt

Ferskur mozzarella, tómatar, rauð basilika, kaldpressuð ólífuolía, balsamic, salt og pipar. 

***

Millimál í fínari kantinum. Hvernig hafið þið það annars þarna úti í heimi? Örugglega búin að fá ykkur göngutúr í sólinni, fara í sund, setið úti á kaffihúsi með eitthvað kalt í glasi? Hápunktur dagsins hjá mér var að komast í sturtu og þessi millibiti, þar af leiðandi hef ég mjög fátt að segja. Heyrumst seinna, haha.

Hvítt

Bjóst nú ekki við því að ég myndi einhvern tímann lakka á mér neglurnar með hvítu naglalakki, minnir mann á það þegar maður var í grunnskóla og litaði þær með tippexi. 

***

Erfitt kvöld og erfið nótt og ástæðan er lítill lasarus. Jón Ómar er nú yfirleitt mjög hraustur strákur, fékk tvisvar smá hita eftir bólusetningarnar og svo í síðustu viku og það er eins og það hafi einfaldlega enn verið að malla í honum greyinu. Við foreldrarnir erum smá buguð af þreytu. Hér þarf að þurrka af og ryksuga en það er ekki ein fruma í líkama mínum sem fær mig til að gera það. Ég sest frekar niður og naglalakka mig og tékka á því hvað er að gerast í heiminum. Ég er pínu svekkt út í sjálfa mig en mataræðið hefur aðeins orðið undir vegna þreytunnar. Ég fæ mér alltaf grænmetissafa og hollan morgunmat og reyni að halda hollustunni í gegnum daginn en undanfarið hef ég ekki verið eins dugleg við að búa mér til salöt og ég hef verið að fá mér sætindi í matarboðum etc. Þreytan getur bara gjörsamlega farið með sjálfsstjórnina. 

Jæja ég ætla að reyna að halla mér smá.

Kate Upton

Va va voom! 

***

Ég sem ætlaði að vera svo dugleg að blogga hef bara rétt svo nennt að hella upp á meira kaffi og hugsa um son minn.  Ég hef ekki alveg tölu á því hvað hann er að vakna oft á nóttunni og í morgun (eða já í nótt) klukkan 5 þá ákvað hann að það væri kominn tími til að fara á fætur, svo glaður og ofursáttur við að vera kominn á ról, ég var ekki alveg jafn glöð. Allavega þá vitið þið mína afsökun fyrir bloggleysinu. 

En þessi kona hér að ofan fær mig til að vilja klippa af mér hárið og blása það og rúlla hvern einasta dag. Það er kannski hæpið að ég myndi nenna því þar sem ég velti stundum fyrir mér hvort blautt hárið á mér sé farið að mygla í snúðnum sem ég er alltaf með. En vá hvað það er flott á henni hárið, ég hef alltaf veri smá veik fyrir svona klippingu, þ.e. ef það er krullað og loft í því. 

Jæja heyrumst síðar. 

Meiri blóm

Keypti þessa fínu hangandi blómapotta í Rúmfatalagernum, ótrúlega ánægð með þá! 

*** 

Þessi blóm eiga að vera mjög harðger þannig að ég vona að þau sofni ekki svefninum langa strax... Ég er rosa ánægð með þessa blómapotta, þeir eru þrír fastir saman og kosta tæplega 1500 kr. Núna langar mig í fleiri svo þeir séu meðfram öllu handriðinu. 

Get ekki haft þetta lengra í bili, verð að hafa mig til og bruna með vinkonum mínum uppí bústað. Bekkurinn minn er að útskrifast úr lögfræðinni og þau eru búin að taka undir sig eitthvað sveitasetur uppí Borgarfirði og við ætlum nokkrar að fara og kíkja á þau og keyra svo heim í kvöld. Ég sem sagt byrjaði í lögfræðinni þegar 1. árið var hálfnað og svo er ég núna að taka eina önn í fæðingarorlof, þannig að þess vegna er ég núna ári á eftir ef einhver skyldi vera að velta þessu fyrir sér. 

Heyrumst!

Mæðradagurinn

Mæðradagsvöndur ♥

Feðgar

Jón Ómar er orðinn svo duglegur við að sitja þannig að í morgun náðum við í vínrauða skrímslið (rúmteppið) niður í geymslu svo Jón Ómar geti tekið dýfur aftur á bak og áfram án þess að meiða sig. Ég veit ekki á hverju ég var þegar þetta teppi var keypt, ég bý ekki í bandarískum bjálkakofa.

***

Mamman er búin að vera pínu þreytt í dag sökum skemmtidagsins/kvöldsins í gær en ó guð hvað það var gaman hjá okkur vinkonunum, mikið er ég heppin að eiga svona skemmtilegar vinkonur. Feðgarnir eyddu sem sagt deginum saman í gær og skilst mér að þeir hafi haft mjög gaman saman. Það verður nóg að gera í vikunni og vonandi fullt af bloggi, heyrumst seinna!

Fáðu bikiníkroppinn!

Ég og elsku vinkona mín, Guðrún, Stockhólmi sumarið 2011. 

*** 

Ég var aðeins að dunda mér í kvöld við að skoða gamlar myndir og þegar ég rakst á þessa mynd þá fór einhver sæluvíma í gegnum líkamann. Þarna sátum við 4 vinkonur rétt hjá þar sem ég og Thelma bjuggum í Stockhólmi. Það var ótrúlega fallegt sumarkvöld og við vorum nýbúnar að borða á rosalega góðum ítölskum stað. Mannlífið iðaði og hvert einasta skynfæri þanið til hins ítrasta. Þarna, á þessari stundu, fann maður lífsgleðina snerta hverja einustu taug í líkamanum. 

Lífið er auðvitað eitt stórt ferðalag þar sem maður lærir inn á sjálfan sig og hvað það er sem sem gerir mann hamingjusaman. Þetta getur verið æði misjafnt hjá fólki. Í mínu tilfelli er það fjölskyldan mín, ástin, vinirnir, stundir eins og þessi sem ég var að lýsa hér að ofan, ferðalög, góður matur, gott vín og falleg tónlist sem leika stórt hlutverk í því að láta mér líða vel. Maður á að gera meira af því sem lætur manni líða vel án þess að vera að hugsa um hvað öðrum kann að finnast um það. 

 

Og úr því að ég er að tala um að láta sér líða vel þá langar mig aðeins að tala um þessa áráttu um að vera með hinn fullkomna líkama, fullkomið útlit etc. Sumarið er farið að banka á dyrnar og alls staðar birtast greinar og viðtöl um það hvernig þú átt að fá hinn fullkomna líkama, stinn læri og flotta magavöðva. Allt auðvitað gert til að selja eitthvað, hvort sem það eru líkamsræktarkort eða kúrar. Þessi árátta og herferð um hinn fullkomna líkama er örugglega að eyðileggja fyrir mörgum að njóta lífsins almennilega. Njóta þess t.d.að fara í sund, á ströndina (kannski ekki mikið um það á Íslandi, nema þá kannski í Nauthólsvík) og stimplar það inn hjá fólki að það dugi ekki.  Einhverjar fáránlegar blaðagreinar eru að eyðileggja sjálfstraust fólks og hindrar það að fólk geti notið þessara yndislegu stunda sem sumarið og lífið hefur upp á að bjóða. Ég veit ég er búin að vera mikið að predika hollt mataræði en svo það sé á hreinu þá tók ég mataræðið mitt í gegn til að líða vel en ekki til að missa ákveðna kílóatölu. Fjölmiðlar eru nefninlega mjög duglegir við að segja manni að maður sé ekki nógu góður eins og maður er, það þurfi alltaf að laga eitthvað. Ég gæti ælt yfir allar þessar greinar, í alvöru. 

Ég hef lengi glímt við þetta að það þurfi alltaf eitthvað aðeins að laga og betrumbæta, þá líði mér fyrst vel. Sem betur fer er þetta að síast út úr kerfinu hjá manni eftir því sem maður verður eldri og lærir betur inn á lífið. Ég ætla ekki að láta einverja Jónu úti í bæ segja mér hvað ég þurfi að gera svo ég geti gengið örugg í bikiní, glætan. Þessi Jóna getur bara gengið ein með sinn stinna og fullkomna rass í sínum sundfötum. Ég tók einu sinni þátt í Ungfrú Reykjavík, hef aldrei verið jafn grönn, jafn brún, með jafn hvítar tennur og hvítt hár en jafnframt jafn óörugg. Þið vitið hvernig þið fáið hinn fullkomna strandkropp? Þið farið á ströndina og takið kroppinn með. Hættum þessari viðbjóðs áráttu í að sækjast eftir hinu "fullkomna". Lifum heilsusamlega, ræktum samböndin við þá sem okkur þykir vænt um, sinnum áhugamálum og hættum að bera okkur saman við aðra.  

Eigið yndislega helgi og njótið lífsins.

Yfirnáttúrulegt

Morgunmaturinn var alveg sérstaklega góður og fallegur í morgunn...

***

Ég ætla bara rétt aðeins að skella á ykkur kveðju, frænka mín er að koma í heimsókn í hádeginu og svo verðum ég og Jón Ómar að snattast aðeins í dag til að undirbúa óvissudaginn á morgun sem við vinkonurnar erum að halda. 

Í gær fór ég í nálastungur eins og ég var búin að segja ykkur frá, ótrúlega merkileg upplifun og mér finnst alveg magnað að það skuli vera til fólk sem hefur einhverja svona yfirnáttúrulega hæfileika til að lesa fólk. Án gríns þá var eins og maðurinn væri að lesa hugsanir mínar. Eftir tímann leið mér ótrúlega vel, get eiginlega ekki lýst tilfinningunni og get eiginlega ekki lýst þessu alveg án þess að vera of persónuleg. Ef þið hafið áhuga á nuddi og nálastungum þá get ég alveg innilega mælt með Kolbeini í Hamraborg 9, yndislegur maður. 

Og fyrst ég er að mæla með hlutum þá langar mig að benda ykkur á nýja og betrumbætta bloggsíðu systur minnar, sem þið finnið HÉR. Hún er bæði að blogga og svo er hún komin með sölusíðu líka, þar sem hún kemur til með að selja margt fallegt. Hún er mesti fagurkeri sem ég veit um og ég fæ mikinn innblástur frá henni. Mér finnst eins og bloggin séu sífellt að verða stærri hérna á Íslandi og fólk er að ná að skapa sér mikil tækifæri með blogginu sem mér finnst frábært. 

Jæja við heyrumst seinna.

Ferskur aspas

Þegar ég labbaði inn í búðina áðan þá var ég alveg hugmyndalaus um hvað ég ætti að hafa í matinn. Endaði á því að kaupa kjúklingabringur, ferskan aspas, parma skinku og melónu. Rosa rosa gott. Kjúklinginn saltaði ég og pipraði og skvetti smá olíu yfir, vafði bringuna í parmaskinku og smurði grænu pestói yfir. Þetta fór svo inn í ofn í ca. 30 mín. Melónuna skar ég niður og vafði restinni af skinkunni á fjóra báta. Aspasinn sauð ég í tæpar 5 mínútur, saltaði hann og reif parmesan ost yfir og setti smá smjörklípu. Þetta tók mig í mesta lagi hálftíma að gera, á meðan þá gaf Svenni Jóni Ómari að borða, baðaði hann og lagði hann í rúmið. Teamwork með besta móti.

Krónan er að gera margt sniðugt í ávaxta og grænmetisdeildinni hjá sér, m.a. eru þeir komnir með risa skífu upp sem sýnir hvaða ávextir eru "in season" og auðvitað langar manni meira að kaupa ávextina þegar þeir eru sem ferskastir, frekar myndi ég vilja geta keypt rosalega fersk og sæt jarðaber tvo mánuði á ári heldur en að kaupa óþroskuð eða mygluð allt árið, en fólk er orðið svo kröfuhart að það þarf allt að vera til allan ársins hring.

Ó sole mió!

Búin að sitja í rúma tvo tíma úti á svölum og lesa og það er svo heitt og svo sterk sólin að ég flúði inn í smá pásu, lúxusvandamál!